شنبه 31 ارديبهشت 1401

گشتاسب عباس‌وند (یاشار)

تاريخ:نوزدهم آذر 1399 ساعت 15:45   |   کد : 163   |   مشاهده: 165


گشتاسب عباس‌وند (یاشار)
 
متولد اول اسفند 1344 اردبیل - بخش یورتچی - روستای بلقیس‌آباد (مالقاتاوا) - بعد از دوره ابتدایی جهت ادامه تحصیل به همراه خانواده به تهران  نقل مکان کردیم - بیشتر اشعارم در قالب غزل و قالب‌های هجایی ترکی آذربایجانی می‌باشد.

 
 
بیزه گلمیر

بیر عومریدیر آی گــویچک اولاندان  بیزه  گلمیر

کونلــــــوم  ائوی  ویرانه  قالاندان  بیزه  گلمیر



داغلاردا سولوب باغچامیزین گوللری چوخدان

یاز عطری خزان فصلی  دولانـدان بیــزه گلمیر



بیر آیریلیغی سالدی کـــــی ویرانی منیمـــدیر

خوش گــونلریمی حسرت آلاندان بیزه گلمیـر



بیر عومریدی کی گونده من اؤللم و دیریللـــم

بخت  آیناسینی  داشه  چالاندان  بیزه  گلمیــر



ساتدیق وطنی قـــــاره پولا ائتمدیک آبــــاد

خوش گونلریمیز کتـــده  قالاندان  بیزه  گلمیر



آغزیندا  یئمک  لیذذه تی  بیر  اؤزگه  داد  اولدو

کندین  قاتیغین  سوتچو  چالاندان  بیزه  گلمیر



آرتیق  نه  گوناه  ائیله میشک  هر  نه  کوسوبدور

گؤز  یاشلی  بولود  باغچا سولاندان  بیزه  گلمیر



بیچاره  یاشار  فصلی  خـزاندان  نه گؤروبسن   

سونبول  ساچینی  غمده  یولاندان  بیزه  گلمیر















نالی چکک

گؤره سن   فرصت  اولار  عومروموزو  دالی  چکک

نقشینی  بیرده  گــــؤزل  یوخ  داهادا  عالی  چکک



چکک  عشقین  سؤزونـو  گیزلی  اورکدن  اوره یه

هانسی  سؤز  اینجیــدجکدیر  یئرینی خالی چکک



اریش  آرغاج  یاناشـــــان  واختی  بوتـون ایلمه لرین

داها  گویچک اولا تبریزده  کی  بیر  خالی (قالی) چکک



نه  اولار  نازلیلارا  ائلده  گؤزل  حورمت  ائدک

یایلیغا  چاتماسا  ال  باشــدا ایپک شالی  چکک



آرینین  زحمتینین  حددینــــــــی  یوکسک  بیله رک  

مین گولون  شهدینی  قاتمیش  او  شیرین  بالی  چکک



ســــــاوالانــــــدان  گؤز  آتیب اردبیلین  ائللـــــــرینه

مئهه  دولموش گدیییندن (گدیگیندن) نئجه خالخــالی چکک



چاروادار  یوخدو  گلین  ایندی  یولون  نقشینـــده

بیر  قوجا  آت کی  ایاقدا  چورویوب  نالی  چکک



شاهلارین  باشلارینا  اولدو  حرمخانه  یاخیــــن

ائل  بؤلوندو  اوزاغا  دوشدو  کی  یارالی  چکک



آرازی  خنجر  اولوب  جوت  یانا  بؤلدو  ائلیمــــی  

کوره  گؤز یاشلی  باخیب  غوصصه للن  حالی چکک



یاشارین  کونلو  ندن آرزیلارین  بوغچاسیـــــدیر

نییه  اولماز  وطن  عشفینده  خوش  ایقبالی  چکک







گله جک

یوللارا گؤز یاشی سپدیم دئدیلر یار گله جک

گلمه دی سینه می یاردیم دئدیلر یار گله جک

او قه در سینـــه می یاردیم یارالاندی یارالار

یارالاندیقجا یارام گولدو دئدی یار گله جک

یارالار سینه میــن اوستونده یاتیب قالمالیدر

باخیشی مرحم اولان ، یاره مه دیلدار گله جک

عاشیم تکجه اونون حوسنونه اونسوز بو جهان

گؤزلریمده کیچیلیب سانکی قفس دار گله جک

حسرتیندن اوره ییم غملی بولوت میثلی دولار

یاغیش آخدیقجا گؤزومدن باشیما قار گله جک

عیب یوخ اینتیظارین لحظه ســی دونیـــایه ده یر

اوندا کی فیکر ائدیسن واردی دوز ایلقار گله جک

باغیبان باخما پوزولموش بوداغین یارپاغینــا 

صبر ائله ایل دولانیب بو بوداغا بار گله جک

شئیدا بولبول بو قدر ائتمه فغان صبر ائیلـــه

بو گولوستانه یئنی غونچا یئنی وار گله جک

یاشارین سینه ده قلبی توتولان بیر قوش تک

چیرپینیر بس کی دئییلر یئنه ده یار گله جک
 
 


 

http://bonyadshahriyar.ir/News/1/163
Share

آدرس ايميل شما:  
آدرس ايميل دريافت کنندگان